Nin Qosol Xabsi Iyo Ganaax Ku Mutay

Had iyo jeer qosolku waxa uu ka mid yahay, xaaladaha lagu garto ama lagu cabiro farxada qofka, waana mid dunida oo dhami ka siman tahay inuu yahay wax dareen ahaan la jeclaysto, hasa yeeshee, sida loo qoslo iyo haddii arrimo kale ama dareen kale kugu jiray waxa uu noqonayaa mid kugu abuuri kara cadho gaadhsiisan in aad ka ashkatooto qof qoslayay, sidii Somaliduba hore u tidhi qosol qoonsimaad dhal. 
      

Haddaba waxa dalka Maraykanka Maxkamad ku taala ay xukun xadhig iyo ganaax isugu jira ku riday nin qoslay oo qof kale ka soo askatooday qosolkiisa, sida ay warbaahinta u cadeeyeen, Garyaqaanada
 
difaacayay eedaysane la sheegay in maxkamadu u jartay, sodon cisho oo xabsiga ah iyo ganaax lacageed oo dhan, shan kun oo dollarka Maraykanka ah, kaas oo lagu eedeeyay in jaarkiisu ka soo dacwooday qosolkiisa oo aad u dheer.

Garyaqaankan ayaa warbaahinta u sheegay in ninka uu wakiilka u ahaa ee u difaacayay, Robert Chiefley oo (41-jir), ah ay boolisku dhawaan u geeyeen, saman lagaga codsanayay inuu maxkamada ku hor yimaado, ka dibna lagu furay dacwad la xidhiidha qosolkiisa.

Qareenka difaacayay ninkan ayaa sheegay in lagu soo eedeeyay in subaxnimadii bishii February 13-ka ahayd uu daaqada gurigiisa oo ku yaala, degmada Rockville Centre, ee jasiirada Long Island, oo ka tirsan New Yorkm uu soo istaagay isaga oo si qod dheer ah ugu qoslaya jaarkiisa.

Qofka jaarkiisa ah ee ka soo ashkatooday ninkan ayaa sida la sheegay ahaa, qof curyaan ah oo naafo ah, kaas oo isagu sida uu ku doodayo uu door biday inuu ka farxiyo, balse uu si kale u qaatay oo cuyub ay arrintii ku noqotay sida uu ku doodayo eedaysanaha xukunku ku dhacay.

Qareenka difaacayay ninkaas oo lagu magacaabo, Andrew ayaa sheegay in ninka uu wakiilka ka yahay, uu leeyahay hag hago, ama gaangi laakiin aanay jirin wax ujeedo ah oo uu ka lahaa ninkaas, laakiin ay mararka qaarkooda cod ama dhawaaq kaga dhegto sida uu ku dooday.

Ninkan xukunka lagu riday ayaa sheegay in aanay jirin wax dhibaato ah oo u dhaxaysay qofkaa ay jaarka yihiin ee eedeeyay, isla markaana uu aad uga xun yahay in uu khalad fahmo, waxaanu sida uu sheegay iska bixin doonaa ganaaxa la saaray isaga oo bisha xadhiga ahna dhamaysan doona ama iibsan doona sida uu warbaahinta u sheegay.

Garyaqaanada difaacayay ninkan ayaa sheegay in garsoorihii qaadayay kiiskaasi uu ka diiday in dacwadan uu xukunkeeda fududeeyo, isla markaana go?aan ku qaatay inuu xukunkaas qalafsan ku rido wakiilkooda sidaana ay dacwadaas xukunkeedu ku dhacay 08-March 2013-ka.

By: Abdi Rachid Abdi Jama (rashka)
rashka282@gmail.com
Borama Awdal Somalia