Barakacayaasha Gargaara-Bari Iyo Garbadadar Ee Awdal Iyo Salel Oo Xaaladooda Laga Dayrinayo?

Sida laga wada warqabo, abaarihii dhowrkii sano ee aan ka soo gudubnay sida isdabajooga ah uga dhacay qaybo badan oo ka tirsan deegaanada hoos yimaada gobollada Awdal iyo Salel, waxay sabab u ahaayeen barakacayaal tiro badan inay ku soo qulqulaan tuulada Gargaara-Bari ee degmada Lughaya ee Gobolka Awdal iyo magaalada Garbo-Dadar ee xarunta degmada G/Dadar ee G/Salel.
halkaas oo barakacayaashaasi ay weli mudo dhowr sano ah ku sugan yihiin kuna dacdaraysan yihiin, isla markaana iyaga oo weliba waqtigan xaadirka ah ka walwalsan xaaladooda nololeed oo maraysa heerkii ugu hooseeyey tan iyo intii ay soo barakeceen, taas oo ay sabab u tahay iyaga oo mudo afar bilood ah aan helin wax raashin ah oo haba yaraadee ay quutaan iyo weliba iyaga oo ilaa hada aan ka garan karayn cid mustaqbalkooda nololeed u dhiil haysa inta ILAAHAY KA SOKAYSA.
Hadaba, iyada oo ay sidaas tahay xaalada barakacayaashaasi ay waqtigan xaadirka ah ku sugan yihiin, hadana, waxa nasiib-darro ah ma arkaysid mana maqlaysid cid bani’aadannimo ahaan uga damqanaysa ama uga xanuusanaysa xaaladooda nololeed, hadii ay tahay xukuumada Somaliland ee Madaxweyne Siilaanyo, bulshada reer Awdal iyo Salel ee ku kala nool dalka gudihiisa iyo dibadiisaba iyo Gudida Abaaraha ee gobollada Awdal iyo Salel. Dabcan, taasina waxay u muuqataa mid si cad uga tarjumaysa inayna barakacayaashaas cidi u maqnayn ceelna u qodnayn.
Isku soo wada duuboo, walow shabakadaha wararka ee gobollada Awdal iyo Salel had iyo jeer laga akhristo lagana daawado deeqo lacageed oo tiro badan oo ku socda barakacayaasha kor ku xusan, deeqahaas oo qurbajooga reer Awdal iyo reer Salel ay u soo gudbiyaan Gudida Abaaraha ee Gobollada Awdal iyo Salel, hadana, ma arkaysid meel deeqahaasi ay maraan ama loo leexiyo, maadaama qaylodhaan ba’ani ay had iyo jeer ka soo yeedhayso barakacayaashaas oo weli mudo dhowr sano ah ku sugan tuulada Gargaara-Bari iyo magaalada G/Dadar oo ka kala tirsan gobollada Awdal iyo Salel.